Sementeira é o club de resolución de problemas da facultade matemáticas da Universidade de Santiago de Compostela (USC). Centrámonos principalmente na resolución de problemas de olimpíadas matemáticas.
Nesta web poderás atopar distintos recursos que fumos creando ao longo dos anos. Destaca a nosa colección de problemas de olimpíadas matemáticas traducidos ao galego.
Colección de problemas de olimpíadas matemáticas
Na carpeta correspondente pódense atopar unha recua de 16 problemas de olimpíadas matemáticas, cada un en cadansúa páxina. Ao final da páxina de cada un deles hai unha sección de comentarios nas que é posible plasmar as dúbidas que poidades ter resolvendo os problemas ou mesmo onde poder compartir as vosas propias solucións dos mesmos.
Os problemas clasifícanse en tres grupos segundo as ferramentas matemáticas que precisan para resolverse:
| Grupo de problemas | Público obxectivo |
|---|---|
| Escolares | Primaria, 1º e 2º de ESO |
| Preuniversitarios | Entre 3º de ESO e 2º de Bacharelato |
| Universitarios | Grao en Matemáticas/Física/Enxeñería |
Para cada un dos grupos anteriores temos problemas máis ou menos complexos. En particular, pódese dar o caso no que para un mesmo problema temos solucións con distinto grao de dificultade. Polo tanto, clasificamos a dificultade das diferentes solucións do 1 ao 5, así como a complexidade orientativa dos mesmos (1:Fácil, 2:Asequible, 3:Intrincado, 4:Difícil, 5:Imposible).
Por último, tamén clasificamos os problemas segundo a súa temática, é dicir, en función da parte das matemáticas ás que fan referencia. Na seguinte táboa podemos ver a poboación de problemas cos que contamos:
| Escolar | Preuniversitario | Universitario | |
|---|---|---|---|
| Álxebra | 0 | 0 | 1 |
| Combinatoria | 0 | 5 | 0 |
| Desigualdades | 0 | 1 | 0 |
| EcuaciónsFuncionais | 0 | 0 | 1 |
| Factorizacións | 0 | 1 | 0 |
| XogosDeEstratexia | 0 | 2 | 0 |
| Xeometría | 0 | 1 | 0 |
| TeoríaDeNúmeros | 0 | 5 | 0 |
| Total | 0 | 15 | 2 |
Seminarios presenciais de Sementeira na USC
Se asistes (ou asistiches en cursos anteriores) aos seminarios presenciais de Sementeira que se imparten na facultade de matemáticas da USC, podes revisar os problemas traballados nas sesións nos resumos correspondentes.